طائرِ عشق کی فریاد ہوئے جاتے ہیں Tayer e Ishq ki feryad hoye jatay hain

طائرِ عشق کی فریاد ہوئے جاتے ہیں

طائرِ عشق کی فریاد ہوئے جاتے ہیں
ہم تیری قید سے آزاد ہوئے جاتے ہیں

سایۂ بام نہیں کیسے ہو مٹّی پہ قیام
آؤ ہم خانماں برباد ہوئے جاتے ہیں

جبر کرتے ہیں پرندوں پہ تو ہم ظالم ہیں
صبر کرتے ہیں تو صیّاد ہوئے جاتے ہیں

حوصلہ بھی ہے, تعیُّن ہے ہمارا ‘شیریں’
خواب لاچار ہیں ‘فرہاد’ ہوئے جاتے ہیں

لوگ خاموش ہیں اثبات و نفی کے مابین
قاضئ شہر ستم زاد ہوئے جاتے ہیں

سین (س) بھی اُنکو سخنور کا نہیں ہے معلوم
اور وہ ‘میر’ کے استاد ہوئے جاتے ہیں

آخری حرف تلک لوگ کہاں پہنچے ہیں
عشق کے این (ع) میں برباد ہوئے جاتے ہیں

روح کے زخم مِرے دل پہ ہیں موقوف ‘صریر’
یہ نئے درس ہمیں یاد ہوئے جاتے ہیں

صریر علی